علشان النوستالجيا بتخلّينا نعيش موود حلو جدّاً، بنفكركم في المقال ده بعشر إعلانات مصريّة كوّنت طفولتنا.

مهما عدّى الزمن، وعلى قد ما بقى في أفكار جديدة و "إفتكاسات"، لسه بنفتكر وبندندن الإعلانات دي مع نفسنا:

إعلان سافو.. سمعت اللحن ده فين قبل كده؟

كلّنا لمّا سمعنا إعلان محمد هنيدي في رمضان 2017، حسّينا إن اللحن مش غريب علينا.

ده صحيح، لو رجعنا بالزمن شوية، هنلاقيه نفس لحن أغنية المطرب الشعبي حمدي باتشان، في إعلان مسحوق غسيل "سافو".

"كيتو".. إزاي تحارب الناموس بأغنية؟

الإعلان اللي بيتطرق للمشكلة وحلّها، مشكلة الأخ اللي بيحكي لأخوه، واللي واضح إنه مش مركّز غير مع الجورنال اللي في إيديه، لكن الحمد لله "كيتو" حلها له!

"الشمعدان" إعلان ولا فيلم رعب؟

رغم خفة دم الفنانة نعيمة الصغير، إلا إنّها كانت مُرعبة حقيقي في إعلان الشمعدان!

صدّق أو لا تصدّق، ده كان إعلان بسكويت للأطفال!

"جيرسي" هي القطط بتاكل شوكولاتة؟

واضح إنهم قرّروا يصالحونا -كأطفال- عن الإعلان اللي فات، فجابولنا قطط في إعلان شوكولاتة "جيرسي".

بس اللي مبيعرفوهوش هو إن الإعلان ده كان بيخوّفنا أكتر!

ثم من إمتى القطط بتاكل شوكولاتة؟

"كوفرتينا" عـ العروسة.. إمواه

من أكتر الإعلانات اللي كانت بتضحّكنا، ولسه لحد النهاردة بنفتكره ونضحك عليه.. إموااه.

"ريري" إعلان وفيلم كارتون كامل

الإعلان ده إتربّت عليه أجيال!

وزي ما شايفين، الإعلان بيحكي التأثير الإيجابي العظيم اللي بيسببه "ريري" واللي بيخلّي الطفل يكبر في دقيقتين، لا سحر ولا شعوذة!

"عبد الرحيم عمرو".. هتجوّز!

الإعلان اللي حل أزمة الجواز عند نص شباب مصر في التسعينات وبمنتهى البساطة، مش عارف تشتري جهازك منين؟ روح "عبد الرحيم عمرو".

احتكم الأمر يا جماعة!

"كيمو كونو".. إمسك نجمين!

مش إحنا بس اللي كنّا صغيّرين، نجومنا اللي بنحبّهم كانوا كدة برده.

شوف خالد أبو النجا، وتامر هجرس في إعلان آيس كريم "كيمو كونو"!

"كوتشي أميجو" حلم الأجيال

الإعلان ده كان بيمثل لينا أكتر من دعاية، كلّنا كنّا بنحلم بـ"كوتشي أميجو اللي بينوّر"، كدلالة على اختلافنا وسط زمايلنا وصحابنا.

شاي "القويري" انقرض.. لكن إعلانه باقي

على لحن أغنية "أنا الواد الجن" غنى حسن الأسمر أغنية إعلان شاي "القويري".

صحيح الشاي ده مبقاش موجود في مصر، بس ذكرى الإعلان لسة موجودة.